كنت في غاية الدهشه عندما حصل لي هذا الموقف و اليكم ما حدث …
أنا من سكان منطقة جنوب السرة، انقطعت عنا خطوط الهواتف فجر يوم الجمعه الماضي ٢٠١١/٨/١٢. حاولت الاتصال عدت مرات على الشكاوي ولا من مجيب وعاودت المحاوله أكثر من مره حتى يوم السبت مما اضطرني للذهاب لمقسم السرة .. ولقد هالني ما رأيت .. كانت الساعه الثالثه والنصف من بعد عصر ذلك اليوم .. ولم يكن هناك اي شخص ابداً .. كانت جميع أبواب المقسم مفتوحه .. حتى وصلت لمكتب رئيس الشعبه ووجدت أرقام الهواتف الخاصة بموظفين المقسم فاتصلت على رئيس الشعبه ووجدته مغلق ثم اتصلت على احد الموظفين واستفسرت منه عن الوضع فكانت إجابته بان هذا الوضع طبيعي بالنسبه لعطلة نهايه الاسبوع ولا يوجد احد يداوم من الموظفين بعطلة نهايه الاسبوع !!!
صادف دخول الفني لاحد الشركات المتخصصة الذي يقوم بصيانة القسم الخاص بالالياف في المقسم، وعند استفسارى منه عن موظفين المقسم كانت إجابته بان لم يرى اي موظف من المقسم في عطلة نهايه الاسبوع وبالاخص في رمضان ماعدى عامل النظافه .. وقمت بتصوير الواقعه بالفيديو .. وما اثار دهشتي!! كيف يحدث مثل هالشي بالكويت؟! لا امن ولا موظفين؟؟
ومنا لوزير المواصلات .. ارجو أخذ الموضوع بعين الاعتبار .. وعدم التهاون في مثل هذه الامور .. ومحاسبه المسؤولين المستهترين والغير مبالين! حيث ان مثل هذه المواقع اذا لم توجد عليها رقابه ستكون معرضه للعبث والتخريب.
واليكم تصوير الفيديو .. كشاهد حي لما حدث.
(Visited 2,299 times, 4 visits today)
Allah y36eek el3afeyaaaa 🙁 walah 7saafaa gala deeratna
Allah ey3afeech.. Eldera mashyaa belgotra 🙂
هذا حال معظم وزارات الدولة في رمضان … بس ماتوقعت يكون الوضع جذي في المرافق الحساسة مثل وزارة المواصلات .. صج حارة كل مين ايدو الو
الله يعطيك العافية على البوست
يا طويل العمر هذول عديمين مسؤوليه … الدوله اتمسكهم امانه علشان يحافظون عليها و اهما كل واحد فيهم شافط على الدوام بحجه رمضان …
لووول
دام دشيت لي الوايرات
جان جيكت على وايرك يمكن طايح ولا شي
ما اقول غير الله يستر على الكويت
ديره ماشيه على البركه
Kaifan5: الله يعافيك وانا والله مقدر انه رمضان ولويه بش عاد يخلون المكان مهيه جذي لا والله ما يجوز هالكلام
Q7fya: اي والله بس ان شالله ما ايكون الوضع جذي على طول
Anonymous: هههههه والله لو اعرف اشلون جان خلصت السالفه من زمان .. بس اشوه الموظف اللي من الشركه الخاصه اللي تقوم بصيانة الالياف الضوئيه صدته عند الباب وطمني انه راح ايردها علي طول اذا ما كانت في مشكله اكبر.. وعلى فكره المكان اللي بتصوير تابع للمناطق القديمه
يعطيك العافيه عالتقرير المميز .. الصراحه هذا غيظ من فيظ و اذا الدول العربيه عندها ربيع احنا يبيلنا صيف وشتا و خريف عشان تنظبط امورنا. الله يحفظ ديرتنا و قيادتنا و يسهل عليهم دروب الاصلاح.
الله يعافيك .. اللهم آمين
وييي اشهالسالفه بعد اشوف لما اندق كله مطنشين ومحد يرد البلوه لين احد دش وقعد يبربس فبيانات الناس وياخذ اللي يبي ويمشي وفوق كل هذا يتحلطمون يبون زيادة معاشات
ما نبيهم ايردون اهم شي الخطوط لا تنقطع بس.. ومن ناحيه البيانات اي والله كلامك صح
بإختصار
كفو عليك هالمقطع والله انك رجل
اشكرك. . ما عليك زود
هذي مؤامرة امريكية يصنعون مكيفات زينة تخليك تقعد بالبيت ماودك تطلع
thank you for showing some reality. inshallah egomoon men el noom.
ana agool 3a6ohom kadar yestahlooon @@
يعطيك العافية على التقرير
بس عطلة نهاية اسبوع ؟ ماني خابر في دوام بالسنترالات
عل عموم كلامك عدل انه تسييب لانه مفروض في امن برة مايخلونك تدخل وسالفت انه مايردون عل التليفونات هم عدل
الواحد مايقول الا
الله المستعان
والله حاله ، خرطي ربعنا و اذا سالتهم ليش جذي قالولك والله رمضااان و صياااام تدري
انا ما اقول الا : هذا سيفوه و هذي خلاجينه
الوكيل عنده ضعف في الجهاز الرقابي
this is shocking! madri shlon ya5thoon ma3ashathom mo m7alela! istaghferila ! ya36eek il3afia
يعطيك العافية بس جودة العمل هي نفسها سواءا في موظفين او ماكو بهذا المقسم. تلفوني خذا 45 يوم على ما اشتغل و 4 زيارات. كنت أشوفهم جدامي ياكلون ويسولفون والتلفون يرن بقسم الشكاوي ومحد يرد. من الأقوال المأثورة بهذا المقسم:
فلان بإجازة ويرد بعد اسبوعين…. الفني مو مداوم … المشكلة مو عندنا… الخط شغال ما في شي … العلة في برغي رقم اربعة … اذا داز مندوب احنا نقوله اي كلام عشان يمشي و ما نسوي شي …
كنت أدز المندوب عشان يروح للموظفين ويدق علي من هناك لأنه تلفونهم محد يشيله ……
خلها على الله
الله يعافيك.. يعيل خلني اقولك هالسالفه.. انا اول ما وصلت لنا الخطوط بجنوب السره رحت بطلع رقم للبيت ومن كثر ما كان الوضع في سنترال حولي سايب نطرت تقريبا نص ساعه على ولا شي. . مو تقول في ناس وايد ولا قاعد انطر دور لا الاخوات قاعدين يتريقون.. ويوم رحت حق وحده منهم قلت لها مو معقوله الكلام اللي يصير هذا !! تتوقع اشقالت؟ تبي شغلك يمشي انطرهم لين يخلصون. . انا اتوقع اكثر من جذي تسيب ما شفت